ଓଡ଼ିଶାର ଉପକୂଳ ଅଞ୍ଚଳ ଓ ଦକ୍ଷିଣ ଓଡ଼ିଶା ମଧ୍ୟରେ ରେଳ ସଂଯୋଗକୁ ଆହୁରି ସୁଦୃଢ଼ କରିବା ପାଇଁ ନୂଆ ପୁରୀ-କୋରାପୁଟ ଏକ୍ସପ୍ରେସ ଟ୍ରେନ୍ ସେବା ଆରମ୍ଭ ହୋଇଛି। ସୋମବାର ଭୁବନେଶ୍ୱର ରେଳ ଷ୍ଟେସନରୁ କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଏହି ଟ୍ରେନ୍କୁ ସବୁଜ ପତାକା ଦେଖାଇ ଶୁଭାରମ୍ଭ କରିଛନ୍ତି।
ପୂର୍ବତଟ ରେଳବାଇ (East Coast Railway) ପକ୍ଷରୁ ଚାଲୁ ହୋଇଥିବା ଏହି ଟ୍ରେନ୍ ଦୀର୍ଘଦିନର ଦାବିକୁ ପୂରଣ କରିଛି। ଏହା ଯାତ୍ରୀଙ୍କୁ ପୁରୀରୁ ସିଧାସଳଖ କୋରାପୁଟ ଯିବାର ସୁବିଧା ଦେବ। ଏହି ସେବାରୁ ତୀର୍ଥଯାତ୍ରୀ, ପର୍ଯ୍ୟଟକ, ଛାତ୍ରଛାତ୍ରୀ, ରୋଗୀ, ବ୍ୟବସାୟୀ ଏବଂ ସାଧାରଣ ଯାତ୍ରୀ ବିଶେଷ ଉପକୃତ ହେବେ।
ଏହି ଟ୍ରେନ୍ ପୁରୀରୁ ଖୋର୍ଦ୍ଧା ରୋଡ୍, ଭୁବନେଶ୍ୱର, ନରାଜ, ଢେଙ୍କାନାଳ, ଅନୁଗୁଳ, ସମ୍ବଲପୁର, ବରଗଡ଼ ରୋଡ୍, ବଲାଙ୍ଗୀର, ଟିଟିଲାଗଡ଼, କେସିଙ୍ଗା, ମୁନିଗୁଡ଼ା, ରାୟଗଡ଼ା, ଟିକିରି, ଲକ୍ଷ୍ମୀପୁର ରୋଡ୍, କାକିରିଗୁମା ଓ ଦାମନଯୋଡ଼ି ଦେଇ କୋରାପୁଟ ପହଞ୍ଚିବ।
ପୁରୀ-କୋରାପୁଟ ଏକ୍ସପ୍ରେସ ସପ୍ତାହରେ ତିନି ଦିନ ଚଳାଚଳ କରିବ। ପୁରୀରୁ ସୋମବାର, ଗୁରୁବାର ଓ ଶନିବାର ଛାଡ଼ିବ। ସେହିପରି କୋରାପୁଟରୁ ମଙ୍ଗଳବାର, ଶୁକ୍ରବାର ଓ ରବିବାର ଯାତ୍ରା ଆରମ୍ଭ କରିବ।
ନିୟମିତ ସେବାରେ ୧୮୪୦୭ ପୁରୀ-କୋରାପୁଟ ଏକ୍ସପ୍ରେସ ସକାଳ ୭ଟାରେ ପୁରୀରୁ ଛାଡ଼ି ରାତି ୧୧ଟା ୩୦ ମିନିଟରେ କୋରାପୁଟ ପହଞ୍ଚିବ। ଫେରନ୍ତା ୧୮୪୦୮ କୋରାପୁଟ-ପୁରୀ ଏକ୍ସପ୍ରେସ ସକାଳ ୫ଟାରେ କୋରାପୁଟରୁ ଛାଡ଼ି ରାତି ୧୦ଟା ୨୦ ମିନିଟରେ ପୁରୀରେ ପହଞ୍ଚିବ।
ଏହି ନୂଆ ଟ୍ରେନ୍ ଚଳାଚଳ ଆରମ୍ଭ ହେବା ସହ ଓଡ଼ିଶାର ଉପକୂଳ ଅଞ୍ଚଳ ଓ ଦକ୍ଷିଣ ଓଡ଼ିଶା ମଧ୍ୟରେ ଯାତାୟାତ ଆହୁରି ସହଜ ହେବ ବୋଲି ଆଶା କରାଯାଉଛି।
