ଜଗନ୍ନାଥ ସ୍ୱାମୀ ନୟନପଥଗାମୀ ଭବତୁ ମେ

ପବିତ୍ର ଦେବସ୍ନାନ ପୂର୍ଣ୍ଣିମା ଅବସରରେ ଓଡ଼ିଶାବାସୀ ଏବଂ ମହାପ୍ରଭୁଙ୍କ କୋଟି କୋଟି ଭକ୍ତଙ୍କୁ ସମ୍ବାଦ ଡିଜିଟାଲ ପକ୍ଷରୁ ହାର୍ଦ୍ଦିକ ଅଭିନନ୍ଦନ ଓ ଶୁଭେଚ୍ଛା। ଏହି ପବିତ୍ର ତିଥିରେ ଶ୍ରୀମନ୍ଦିର ପରିସରସ୍ଥିତ ସ୍ନାନବେଦୀରେ ମହାପ୍ରଭୁ ଶ୍ରୀଜଗନ୍ନାଥ, ଶ୍ରୀବଳଭଦ୍ର ଓ ଦେବୀ ସୁଭଦ୍ରାଙ୍କ ଦେବସ୍ନାନ ନୀତି ଭକ୍ତିଭାବର ସହ ସମ୍ପନ୍ନ ହୋଇଛି।

ରଥଯାତ୍ରା ପୂର୍ବରୁ ଅନୁଷ୍ଠିତ ଏହି ପବିତ୍ର ସ୍ନାନଯାତ୍ରାକୁ ନେଇ ଶ୍ରୀକ୍ଷେତ୍ରରେ ଉତ୍ସବମୁଖର ପରିବେଶ ସୃଷ୍ଟି ହୋଇଥିଲା। ଲକ୍ଷାଧିକ ଭକ୍ତଙ୍କ ସମାଗମରେ ପୁରୀର ବଡ଼ଦାଣ୍ଡ ଭକ୍ତିମୟ ହୋଇଉଠିଥିଲା। “ଜୟ ଜଗନ୍ନାଥ” ଧ୍ୱନିରେ ସମଗ୍ର ଶ୍ରୀକ୍ଷେତ୍ର ପ୍ରକମ୍ପିତ ହୋଇଥିଲା। ବଡ଼ଦାଣ୍ଡରେ ପାଦ ରଖି ଭକ୍ତମାନେ ନିଜକୁ ଧନ୍ୟ ମନେ କରିଥିଲେ।

ପାରମ୍ପରିକ ନୀତି ଅନୁଯାୟୀ ମହାପ୍ରଭୁଙ୍କୁ ୧୦୮ କଳସ ପବିତ୍ର ଜଳରେ ସ୍ନାନ କରାଯାଇଥିଲା। ଦେବସ୍ନାନ ପରେ ମହାପ୍ରଭୁ ଗଜାନନ ବା ହାତୀବେଶରେ ଭକ୍ତଙ୍କୁ ଦର୍ଶନ ଦେଇଥିଲେ। ଏହି ଅନନ୍ୟ ବେଶ ଦର୍ଶନ ପାଇଁ ସ୍ନାନମଣ୍ଡପକୁ ଆକର୍ଷଣୀୟ ଭାବେ ସଜାଯାଇଥିଲା।

ଭକ୍ତଙ୍କ ସୁବିଧାକୁ ଦୃଷ୍ଟିରେ ରଖି ମାର୍କେଟ୍ ଛକରୁ ଶ୍ରୀମନ୍ଦିର ପର୍ଯ୍ୟନ୍ତ ଛାଉଣିଯୁକ୍ତ ବ୍ୟାରିକେଡ୍ ବ୍ୟବସ୍ଥା କରାଯାଇଥିଲା, ଯାହା ଫଳରେ ଖରା କିମ୍ବା ବର୍ଷାରେ ଭକ୍ତମାନେ ଅସୁବିଧାର ସମ୍ମୁଖୀନ ହୋଇନଥିଲେ। ସୁରକ୍ଷା ପାଇଁ ରାଜ୍ୟ ସରକାର, ପୁରୀ ଜିଲ୍ଲା ପ୍ରଶାସନ ଓ ଶ୍ରୀମନ୍ଦିର ପ୍ରଶାସନ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଥିଲା। ଶ୍ରୀମନ୍ଦିର ଏବଂ ବଡ଼ଦାଣ୍ଡରେ ପୁଲିସ ଫୋର୍ସ ମୁତୟନ ସହ ସିସିଟିଭି ମାଧ୍ୟମରେ କଡ଼ା ନଜର ରଖାଯାଇଥିଲା।

ଏହି ଅବସରରେ ମୁଖ୍ୟମନ୍ତ୍ରୀ ପବିତ୍ର ଦେବସ୍ନାନ ପୂର୍ଣ୍ଣିମାର ଶୁଭେଚ୍ଛା ଜଣାଇ କହିଥିଲେ ଯେ, ମହାପ୍ରଭୁଙ୍କ ଅପାର କୃପା ସମସ୍ତଙ୍କ ଉପରେ ବର୍ଷିତ ହେଉ ଏବଂ ଓଡ଼ିଶା ସମୃଦ୍ଧି ଓ ଶାନ୍ତିର ପଥରେ ଆଗେଇ ଚାଲୁ। ସେ ଶ୍ରୀମନ୍ଦିରରେ ପହଞ୍ଚି ମହାପ୍ରଭୁଙ୍କ ଦର୍ଶନ କରିବା ସହ ସାହାଣମେଳାରେ ଯୋଗଦେଇଥିଲେ।

ଦେବସ୍ନାନ ପୂର୍ଣ୍ଣିମା ନୀତି ନିର୍ଘଣ୍ଟ

• ଭୋର ୪:୩୦ – ମଙ୍ଗଳାର୍ପଣ
• ସକାଳ ୫:୦୦–୭:୦୦ – ଡୋରଲାଗି, ପୁଷ୍ପାଞ୍ଜଳି ଓ ପହଣ୍ଡି
• ସକାଳ ୯:୦୦ – ମଙ୍ଗଳ ଆଳତି
• ୯:୧୫ – ମଇଲମ
• ୯:୨୫ – ତଡ଼ପ ଲାଗି
• ୯:୪୫ – ଅଧର ପୋଛା
• ୧୦:୨୦ – ଅବକାଶ
• ୧୦:୩୦ – ରୋଷହୋମ
• ୧୦:୫୫ – ସୂର୍ଯ୍ୟପୂଜା
• ୧୧:୧୦ – ଦ୍ୱାରପାଳ ପୂଜା
• ୧୧:୨୫ – ବେଶ ଶେଷ
• ମଧ୍ୟାହ୍ନ ୧୨:୦୦–ଅପରାହ୍ଣ ୨:୦୦ – ଜଳବିଜେ, ପୂଜା ଓ ଦେବସ୍ନାନ
• ଅପରାହ୍ଣ ୨:୩୦ – ମଇଲମ, ମେକାପ, ସର୍ବାଙ୍ଗ, ନୂଆଲୁଗା ଲାଗି
• ଅପରାହ୍ଣ ୩:୩୦ – ଛେରା ପହଁରା
• ଅପରାହ୍ଣ ୪:୦୦–୫:୦୦ – ହାତୀବେଶ
• ସନ୍ଧ୍ୟା ୫:୩୦–୭:୩୦ – ଘଣ୍ଟଛତା ଓ ସକାଳଧୂପ
• ସନ୍ଧ୍ୟା ୭:୩୦–ରାତି ୯:୩୦ – ସାହାଣମେଳା
• ରାତି ୮:୦୦ – ଦକ୍ଷିଣିଘର ଭୋଗ
• ରାତି ୧୦:୦୦ – ହାତୀବେଶ ମଇଲମ
• ରାତି ୧୦:୩୦ – ପୁଷ୍ପାଞ୍ଜଳି ଓ ଡୋରଲାଗି
• ରାତି ୧୧:୦୦–ଭୋର ୨:୦୦ – ବାହୁଡ଼ା ପହଣ୍ଡି
• ଭୋର ୨:୩୦ – ସୁନା ଚିତା ଓ ରାହୁରେଖା ମଇଲମ