ଦୁବାଇରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ପ୍ରବାସୀ ଓଡ଼ିଆଙ୍କ ପକ୍ଷରୁ ଉତ୍ସାହପୂର୍ଣ୍ଣ ସ୍ୱାଗତ ଜଣାଯାଇଛି। ଏହି ଅବସରରେ ୮୦୦ରୁ ଅଧିକ ଓଡ଼ିଆ ସମୁଦାୟର ଲୋକ ଏକାଠି ହୋଇ ମୁଖ୍ୟମନ୍ତ୍ରୀଙ୍କୁ ଆତ୍ମୀୟତାର ସହ ସ୍ୱାଗତ କରିଥିଲେ।କାର୍ଯ୍ୟକ୍ରମରେ ଓଡ଼ିଶୀ ନୃତ୍ୟ ସହ ବିଭିନ୍ନ ପାରମ୍ପରିକ ଲୋକନୃତ୍ୟ ପରିବେଷଣ କରାଯାଇଥିଲା। ବିଦେଶ ମାଟିରେ ଓଡ଼ିଆ କଳା, ସଂସ୍କୃତି ଓ ପରମ୍ପରାର ଏଭଳି ଝଲକ ଉପସ୍ଥିତ ସମସ୍ତଙ୍କ ମନ ଜିଣିଥିଲା। ପାରମ୍ପରିକ ଓଡ଼ିଆ ବ୍ୟଞ୍ଜନ ମଧ୍ୟ ଏହି ଆୟୋଜନକୁ ଆହୁରି ଆତ୍ମୀୟ କରିଥିଲା।
ଏହି ଅବସରରେ ପ୍ରବାସୀ ଓଡ଼ିଆମାନେ ମୁଖ୍ୟମନ୍ତ୍ରୀଙ୍କ ସହ ସିଧାସଳଖ ଭାବେ ମତବିନିମୟ କରିଥିଲେ। ଓଡ଼ିଶା ସହ ନିଜର ସମ୍ପର୍କ, ରାଜ୍ୟର ବିକାଶ ଏବଂ ପ୍ରବାସୀ ଓଡ଼ିଆଙ୍କ ଭୂମିକାକୁ ନେଇ ଆଲୋଚନା ହୋଇଥିଲା।ମୁଖ୍ୟମନ୍ତ୍ରୀ ୟୁଏଇରେ ରହୁଥିବା ଓଡ଼ିଆ ସମୁଦାୟର ସାଂସ୍କୃତିକ ଏକତାକୁ ପ୍ରଶଂସା କରିବା ସହ ବିଦେଶରେ ଓଡ଼ିଆ ଭାଷା, ପରମ୍ପରା ଓ ସଂସ୍କୃତିକୁ ଜୀବନ୍ତ ରଖିବାରେ ସେମାନଙ୍କ ପ୍ରୟାସକୁ ସ୍ୱୀକାର କରିଥିଲେ।
ଦୁବାଇର ଏହି ସମାବେଶ କେବଳ ଏକ ସ୍ୱାଗତ କାର୍ଯ୍ୟକ୍ରମ ନଥିଲା, ବରଂ ବିଦେଶ ମାଟିରେ ଓଡ଼ିଆ ମାଟି, ଭାଷା ଓ ସଂସ୍କୃତି ସହ ପ୍ରବାସୀ ଓଡ଼ିଆଙ୍କ ଅତୁଟ ସମ୍ପର୍କର ଏକ ଭାବପୂର୍ଣ୍ଣ ପ୍ରତିଛବି ଭାବେ ସାମ୍ନାକୁ ଆସିଥିଲା।
