ଆଗାମୀ ଖରିଫ ଋତୁକୁ ନଜରରେ ରଖି କେନ୍ଦ୍ର ସରକାର ଚାଷ ପ୍ରସ୍ତୁତିକୁ ନେଇ ସତର୍କ ହୋଇଛନ୍ତି। କେନ୍ଦ୍ର କୃଷିମନ୍ତ୍ରୀ ଶିବରାଜ ସିଂହ ଚୌହାନ ଅଧିକାରୀମାନଙ୍କୁ ପ୍ରତି ସପ୍ତାହରେ ରଣନୀତି ବୈଠକ କରି ଜମି ସ୍ତରର ପରିସ୍ଥିତି, ଜଳଭଣ୍ଡାରର ଜଳସ୍ତର ଏବଂ ମଣ୍ଡିରେ ଫସଲ ଦର ଉପରେ ନିୟମିତ ନଜର ରଖିବାକୁ ନିର୍ଦ୍ଦେଶ ଦେଇଛନ୍ତି।
ଖରିଫ-୨୦୨୬ ପ୍ରସ୍ତୁତିକୁ ନେଇ ହୋଇଥିବା ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ ଏହି ନିଷ୍ପତ୍ତି ନିଆଯାଇଛି। ବୈଠକରେ କୁହାଯାଇଛି ଯେ, ଏଲ୍-ନିନୋ ପ୍ରଭାବ ଯୋଗୁଁ ଚଳିତ ବର୍ଷ ବର୍ଷା ଉପରେ ପ୍ରଭାବ ପଡ଼ିପାରେ ଏବଂ ଏହାର ସିଧା ପ୍ରଭାବ ଚାଷ କାର୍ଯ୍ୟ ଉପରେ ଦେଖାଯାଇପାରେ।
କେନ୍ଦ୍ର ସରକାରଙ୍କ ଆକଳନ ଅନୁସାରେ ଓଡ଼ିଶା ସମେତ ୧୨ଟି ରାଜ୍ୟ ଏଲ୍-ନିନୋ ପ୍ରଭାବରେ ଅଧିକ ପ୍ରଭାବିତ ହୋଇପାରନ୍ତି। ଏହି ତାଲିକାରେ ଉତ୍ତର ପ୍ରଦେଶ, ତାମିଲନାଡୁ, ଆନ୍ଧ୍ର ପ୍ରଦେଶ, ତେଲେଙ୍ଗାନା, ଗୁଜରାଟ, ରାଜସ୍ଥାନ, ବିହାର, ମଧ୍ୟପ୍ରଦେଶ, ଝାଡ଼ଖଣ୍ଡ, ମହାରାଷ୍ଟ୍ର ଏବଂ କର୍ଣ୍ଣାଟକ ମଧ୍ୟ ରହିଛି। କର୍ଣ୍ଣାଟକକୁ ସବୁଠାରୁ ଅଧିକ ବିପଦପୂର୍ଣ୍ଣ ରାଜ୍ୟ ଭାବେ ଚିହ୍ନଟ କରାଯାଇଛି।
ଦେଶବ୍ୟାପୀ ୩୨୬ଟି ଜିଲ୍ଲାକୁ ଉଚ୍ଚ ବିପଦପୂର୍ଣ୍ଣ ଅଞ୍ଚଳ ଭାବେ ଚିହ୍ନଟ କରାଯାଇଛି। ଏହି ଜିଲ୍ଲାଗୁଡ଼ିକ ପାଇଁ ସ୍ୱତନ୍ତ୍ର ଜିଲ୍ଲାସ୍ତରୀୟ କାର୍ଯ୍ୟଯୋଜନା ପ୍ରସ୍ତୁତ କରାଯାଉଛି, ଯାହା ଦ୍ୱାରା ପ୍ରତିକୂଳ ପାଗ ପରିସ୍ଥିତିର ମୁକାବିଲା କରାଯାଇପାରିବ।
ରାଜ୍ୟ ସରକାରମାନଙ୍କ ସହ ସମନ୍ୱୟ ରଖି ଫସଲ ଭିତ୍ତିକ ଜରୁରୀକାଳୀନ ଯୋଜନା ମଧ୍ୟ ପ୍ରସ୍ତୁତ କରାଯାଉଛି। ଏଥିରେ ଜଳ ସଂରକ୍ଷଣ, ମାଟିରେ ଆର୍ଦ୍ରତା ବଜାୟ ରଖିବା, ଅନ୍ତଃଫସଲ ଚାଷ ଏବଂ ସ୍ଥାନୀୟ ପରିସ୍ଥିତି ଅନୁଯାୟୀ ବିକଳ୍ପ ଫସଲ ଚାଷ ଉପରେ ବିଶେଷ ଗୁରୁତ୍ୱ ଦିଆଯାଉଛି।
ଚାଷୀମାନଙ୍କୁ ସମ୍ଭାବ୍ୟ କ୍ଷତିରୁ ରକ୍ଷା କରିବା ପାଇଁ କପା ଚାଷ ଉତ୍ପାଦନ ବଢ଼ାଇବାକୁ ମିଶନ ମୋଡରେ କାମ କରିବାକୁ ସରକାର ଯୋଜନା କରୁଛନ୍ତି। ଉଚ୍ଚ ଉତ୍ପାଦନକ୍ଷମ ବିହନ, ଅନ୍ତଃଫସଲ ଚାଷ, ମଲ୍ଚିଂ ଏବଂ ଆର୍ଦ୍ରତା ସଂରକ୍ଷଣ ଭଳି ବୈଜ୍ଞାନିକ ପଦ୍ଧତି ବ୍ୟବହାର କରି ଉତ୍ପାଦନ ବଢ଼ାଇବା ଉପରେ ଜୋର ଦିଆଯାଉଛି।
ଏହା ସହିତ ଡାଲି ଜାତୀୟ ଫସଲରେ ଆତ୍ମନିର୍ଭରଶୀଳତା ହାସଲ କରିବା ପାଇଁ ମଧ୍ୟ ପ୍ରୟାସ ଚାଲିଛି। ଆରହର, ବିରି ଓ ମୁଗ ଉତ୍ପାଦନ ବଢ଼ାଇବା ପାଇଁ ଚାଷ କ୍ଷେତ୍ର ବୃଦ୍ଧି, ଉନ୍ନତମାନର ବିହନ ବଣ୍ଟନ ଏବଂ ଚାଷୀଙ୍କୁ ବୈଷୟିକ ସହାୟତା ଯୋଗାଇବା ଉପରେ ଗୁରୁତ୍ୱ ଦିଆଯାଉଛି।
ବୈଠକରେ କୃଷିମନ୍ତ୍ରୀ କହିଛନ୍ତି ଯେ, ଦେଶରେ ବର୍ତ୍ତମାନ ସାରର ପର୍ଯ୍ୟାପ୍ତ ମହଜୁଦ ରହିଛି। ତେବେ ମୌସୁମୀ ବର୍ଷା ଆଗକୁ ବଢ଼ିବା ସହ ସମ୍ଭାବ୍ୟ ଅଭାବ ଥିବା ଅଞ୍ଚଳଗୁଡ଼ିକରେ ସାରର ସୁଚାରୁ ବଣ୍ଟନ ସୁନିଶ୍ଚିତ କରିବାକୁ ସେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
ଏଲ୍-ନିନୋର ସମ୍ଭାବ୍ୟ ପ୍ରଭାବକୁ ନେଇ କେନ୍ଦ୍ର ସରକାର ପୂର୍ବ ପ୍ରସ୍ତୁତି ଆରମ୍ଭ କରିଥିବାବେଳେ ଚାଷୀଙ୍କ ସ୍ୱାର୍ଥ ସୁରକ୍ଷା ଏବଂ ଖରିଫ ଚାଷକୁ ସଫଳ କରିବା ପାଇଁ ବିଭିନ୍ନ ପଦକ୍ଷେପ ନିଆଯାଉଛି।
