ଓଡ଼ିଶା ପାଇଁ ଗର୍ବର ବିଷୟ। ବିଶ୍ୱର ଶ୍ରେଷ୍ଠ ୨% ବୈଜ୍ଞାନିକଙ୍କ ତାଲିକାରେ ସ୍ଥାନ ପାଇଛନ୍ତି ରାଉରକେଲା ସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (NIT)ର ୨୯ ଜଣ ଅଧ୍ୟାପକ ଏବଂ ଜଣେ ଗବେଷଣା ସ୍ନାତକ। ଷ୍ଟାନଫୋର୍ଡ ବିଶ୍ୱବିଦ୍ୟାଳୟର ଗବେଷକମାନେ ପ୍ରସ୍ତୁତ କରିଥିବା ଏହି ତାଲିକାକୁ ଏଲସେଭିୟର ଏହାର ଡାଟା ରିପୋଜିଟୋରି ମାଧ୍ୟମରେ ପ୍ରକାଶ କରିଛି।
ବିଭିନ୍ନ ବିଷୟର ଗବେଷକଙ୍କୁ ମିଳିଛି ସ୍ଥାନ
ଆମେରିକାର ଷ୍ଟାନଫୋର୍ଡ ବିଶ୍ୱବିଦ୍ୟାଳୟର ପ୍ରଫେସର ଜନ୍ ପି. ଏ. ଇଓଆନିଡିସ୍ ଏବଂ ତାଙ୍କ ଟିମ୍ ଏହି ତାଲିକା ପ୍ରସ୍ତୁତ କରିଛନ୍ତି। ଗବେଷକମାନଙ୍କ ଗବେଷଣା ପ୍ରବନ୍ଧକୁ କେତେଥର ଉଦ୍ଧୃତ କରାଯାଇଛି, ସେମାନଙ୍କ ସହଯୋଗୀ ଗବେଷଣା ଏବଂ ଅବଦାନ ଆଦି ଆଧାରରେ ଏହି ତାଲିକା ପ୍ରସ୍ତୁତ ହୋଇଛି। ଏଥିରେ ସାରା ଜୀବନର ଗବେଷଣା ଅବଦାନ ସହ ଗୋଟିଏ ବର୍ଷର ଗବେଷଣା ପ୍ରଭାବକୁ ମଧ୍ୟ ବିଚାରକୁ ନିଆଯାଇଛି।
NIT ରାଉରକେଲାର ଅଧ୍ୟାପକମାନେ ଜୀବ ବିଜ୍ଞାନ, ଧାତୁ ଓ ପଦାର୍ଥ ବିଜ୍ଞାନ, ଗଣିତ, ରାସାୟନିକ ଇଞ୍ଜିନିୟରିଂ, ବାୟୋଟେକ୍ନୋଲୋଜି, ମେଡିକାଲ ଇଞ୍ଜିନିୟରିଂ, ଭୌତିକ ବିଜ୍ଞାନ, ଇଲେକ୍ଟ୍ରୋନିକ୍ସ, ସିଭିଲ୍ ଇଞ୍ଜିନିୟରିଂ ଓ ଅନ୍ୟାନ୍ୟ ବିଷୟରେ ଗବେଷଣା କରୁଛନ୍ତି।
ନିର୍ଦ୍ଦେଶକ ଜଣାଇଲେ ଅଭିନନ୍ଦନ
ଏହି ସଫଳତା ପାଇଁ NIT ରାଉରକେଲାର ନିର୍ଦ୍ଦେଶକ ପ୍ରଫେସର କେ. ଉମାମହେଶ୍ୱର ରାଓ ଗବେଷକମାନଙ୍କୁ ଅଭିନନ୍ଦନ ଜଣାଇଛନ୍ତି। ଏହା ଅନୁଷ୍ଠାନର ଗବେଷଣାର ଗୁଣବତ୍ତା, ନିରନ୍ତର ପ୍ରୟାସ ଏବଂ ବିଶ୍ୱସ୍ତରୀୟ ଗୁରୁତ୍ୱକୁ ଦର୍ଶାଉଛି ବୋଲି ସେ କହିଛନ୍ତି। ଏହି ସଫଳତା ଛାତ୍ରଛାତ୍ରୀ ଓ ଯୁବ ଗବେଷକଙ୍କୁ ପ୍ରେରଣା ଦେବ ବୋଲି ସେ ଆଶା ପ୍ରକାଶ କରିଛନ୍ତି।
IIT ଗୁଆହାଟୀରେ କାର୍ଯ୍ୟରତ ଗବେଷକଙ୍କୁ ମଧ୍ୟ ସ୍ୱୀକୃତି
NIT ରାଉରକେଲାରୁ ପିଏଚ୍ଡି କରିଥିବା ଡକ୍ଟର ଶ୍ରୀମନ୍ତ ପାତ୍ର ମଧ୍ୟ ଏହି ତାଲିକାରେ ସ୍ଥାନ ପାଇଛନ୍ତି। ସେ ବର୍ତ୍ତମାନ IIT ଗୁଆହାଟୀରେ DST-INSPIRE ଫ୍ୟାକଲ୍ଟି ଭାବେ କାର୍ଯ୍ୟରତ ଅଛନ୍ତି।
ଏହା ସହ ୨୦୨୬ର ଷ୍ଟାନଫୋର୍ଡ ଶ୍ରେଷ୍ଠ ୨% ବୈଜ୍ଞାନିକ ତାଲିକାର କ୍ୟାରିୟର-ଲଙ୍ଗ୍ ବର୍ଗରେ ୧୯ ଜଣ ଗବେଷକ ସ୍ଥାନ ପାଇଛନ୍ତି। ଏହା ସେମାନଙ୍କ ଦୀର୍ଘକାଳୀନ ଗବେଷଣା ଅବଦାନକୁ ଦର୍ଶାଉଛି।
