୧୭୫ ସ୍ନାଚଂର ଗିରଫ, ୩୦୪ ମୋବାଇଲ୍ ଉଦ୍ଧାର; ଲକ୍ଷାଧିକ ଭକ୍ତଙ୍କ ସୁରକ୍ଷାରେ ଗଢ଼ିଲା ନୂଆ ରେକର୍ଡ
ବିଶ୍ୱପ୍ରସିଦ୍ଧ ଶ୍ରୀଜଗନ୍ନାଥଙ୍କ ରଥଯାତ୍ରା-୨୦୨୬ରେ ଲକ୍ଷାଧିକ ଭକ୍ତଙ୍କ ସମାଗମ ମଧ୍ୟରେ ଅପରାଧୀଙ୍କ ବିରୋଧରେ ଏକ ବଡ଼ ଓ ସଫଳ ଅଭିଯାନ ଚଳାଇଛି ପୁରୀ ପୁଲିସ। ସ୍ନାଚଂର, ପକେଟମାରି ଓ ଚୋରି ଘଟଣାକୁ ରୋକିବା ପାଇଁ ସ୍ୱତନ୍ତ୍ର ଭାବେ ଗଠିତ ଆଣ୍ଟି-ସ୍ନାଚିଂ ଟିମ୍ ରଥଯାତ୍ରା ସମୟରେ ୧୭୫ ଜଣ ସ୍ନାଚଂର ଗିରଫ କରିବା ସହ ୩୦୪ଟି ହଜିଯାଇଥିବା ମୋବାଇଲ୍ ଫୋନ୍ ଉଦ୍ଧାର କରି ଏକ ଉଲ୍ଲେଖନୀୟ ସଫଳତା ହାସଲ କରିଛି। ଏହାଛଡ଼ା ସୁନା ଅଳଙ୍କାର, ନଗଦ ଟଙ୍କା, ପର୍ସ, ପରିଚୟପତ୍ର ଓ ଅନ୍ୟାନ୍ୟ ମୂଲ୍ୟବାନ ସାମଗ୍ରୀ ମଧ୍ୟ ଉଦ୍ଧାର କରାଯାଇ ପ୍ରକୃତ ମାଲିକଙ୍କୁ ଫେରାଇ ଦିଆଯାଉଛି।
ପୁରୀ ଏସ୍ପି ପ୍ରତୀକ ସିଂହଙ୍କ ନେତୃତ୍ୱରେ ସମସ୍ତ ଥାନା ଓ ସାଇବର ପୁଲିସର ମିଳିତ ପ୍ରୟାସରେ ଏହି ବ୍ୟାପକ ଅଭିଯାନ ଚାଲିଥିଲା। ବଡ଼ଦାଣ୍ଡ, ଶ୍ରୀମନ୍ଦିର ପରିସର, ବସ୍ଷ୍ଟାଣ୍ଡ, ସମୁଦ୍ରକୂଳ ଓ ଅନ୍ୟାନ୍ୟ ଜନଗହଳିପୂର୍ଣ୍ଣ ସ୍ଥାନରେ ସାଧା ପୋଷାକରେ ପୁଲିସ କର୍ମଚାରୀ ମୁତୟନ କରାଯାଇଥିଲା। CCTV ନଜରଦାରି, ଅତ୍ୟାଧୁନିକ ପ୍ରଯୁକ୍ତି, ଗୁଇନ୍ଦା ସୂଚନା ଓ ତ୍ୱରିତ ପ୍ରତିକ୍ରିୟାକାରୀ ଟିମ୍ର ସମନ୍ୱୟ ଯୋଗୁଁ ଅପରାଧୀମାନଙ୍କୁ ଚିହ୍ନଟ କରି ତୁରନ୍ତ ଗିରଫ କରିବା ସମ୍ଭବ ହୋଇଥିଲା।
ଗିରଫ ହୋଇଥିବା ସମସ୍ତ ଅଭିଯୁକ୍ତଙ୍କ ବିରୋଧରେ ଆଇନ ଅନୁଯାୟୀ ମାମଲା ରୁଜୁ କରାଯାଇ ସେମାନଙ୍କୁ ଅଦାଲତକୁ ପଠାଯାଇଛି। ରଥଯାତ୍ରା ପରି ବିଶାଳ ଧାର୍ମିକ ସମାବେଶରେ ସଂଗଠିତ ଛିନତାଇ ଚକ୍ର ଓ ରାସ୍ତା ଅପରାଧ ବିରୋଧରେ ପୁରୀ ପୁଲିସର ‘ଜିରୋ ଟଲେରାନ୍ସ’ ନୀତିର ଏହା ଏକ ଦୃଢ଼ ବାର୍ତ୍ତା ବୋଲି ଅଧିକାରୀମାନେ କହିଛନ୍ତି।
ଆଜି ଆୟୋଜିତ ‘ମିସିଂ ମୋବାଇଲ୍ ମେଳା’ରେ ଉଦ୍ଧାର ହୋଇଥିବା ଅନେକ ମୋବାଇଲ୍ ଫୋନ୍ ସେମାନଙ୍କ ପ୍ରକୃତ ମାଲିକଙ୍କୁ ହସ୍ତାନ୍ତର କରାଯାଇଥିଲା। ଦୀର୍ଘଦିନ ପରେ ନିଜର ହଜିଯାଇଥିବା ଫୋନ୍ ଫେରି ପାଇ ଲୋକମାନଙ୍କ ମୁହଁରେ ଖୁସି ଫେରିଥିଲା। ଅନେକ ନାଗରିକ ପୁରୀ ପୁଲିସର ତ୍ୱରିତ ପଦକ୍ଷେପ, ସ୍ୱଚ୍ଛ କାର୍ଯ୍ୟପ୍ରଣାଳୀ ଏବଂ ଜନମୁଖୀ ସେବାକୁ ଭୁରିଭୁରି ପ୍ରଶଂସା କରିଥିଲେ।
ପୁରୀ ପୁଲିସ ପକ୍ଷରୁ କୁହାଯାଇଛି ଯେ, ଯେଉଁମାନଙ୍କର ମୋବାଇଲ୍ ହଜିଯାଇଛି ଏବଂ ଏପର୍ଯ୍ୟନ୍ତ ଅଭିଯୋଗ କରିନାହାନ୍ତି, ସେମାନେ ‘ସହାୟକ’ WhatsApp Chatbot (+91 87631 99400) ମାଧ୍ୟମରେ ସହଜରେ ଅନଲାଇନ୍ ଅଭିଯୋଗ କରିପାରିବେ।
ରଥଯାତ୍ରା-୨୦୨୬ରେ ପୁରୀ ପୁଲିସର ଏହି ସଫଳତା କେବଳ ଅପରାଧ ଦମନରେ ନୁହେଁ, ବରଂ ଜନସୁରକ୍ଷା, ଆଧୁନିକ ପୁଲିସିଂ ଏବଂ ‘Citizen First’ ନୀତିକୁ ସଫଳ ଭାବେ କାର୍ଯ୍ୟକାରୀ କରିବାର ଏକ ଉଜ୍ଜ୍ୱଳ ଉଦାହରଣ ଭାବେ ଉଭା ହୋଇଛି।
