ଓଡ଼ିଶା କୃଷି ପ୍ରୋତ୍ସାହନ ଓ କୃଷକ ସଶକ୍ତିକରଣ (OAPM) ପ୍ରକଳ୍ପକୁ କ୍ୟାବିନେଟ୍‌ର ମଞ୍ଜୁରି

₹୬,୫୩୭ କୋଟି ବ୍ୟୟରେ ୬ ବର୍ଷିଆ ଯୋଜନା, ୭୦ ଲକ୍ଷରୁ ଅଧିକ କୃଷକ ପରିବାର ହେବେ ଉପକୃତ

ଭୁବନେଶ୍ୱର: ରାଜ୍ୟର କୃଷି କ୍ଷେତ୍ରକୁ ଅଧିକ ଆଧୁନିକ, ବଜାରମୁଖୀ ଓ ଲାଭଜନକ କରିବା ଲକ୍ଷ୍ୟରେ ଓଡ଼ିଶା ସରକାର ‘ଓଡ଼ିଶା କୃଷି ପ୍ରୋତ୍ସାହନ ଓ କୃଷକ ସଶକ୍ତିକରଣ (Odisha Agriculture Promotion & Farmers Empowerment Mission – OAPM)’ ପ୍ରକଳ୍ପକୁ ଅନୁମୋଦନ କରିଛନ୍ତି। ଏହି ଯୋଜନା ୨୦୨୫-୨୬ରୁ ୨୦୩୦-୩୧ ପର୍ଯ୍ୟନ୍ତ ୬ ବର୍ଷ ଧରି କାର୍ଯ୍ୟକାରୀ ହେବ।

ଏହି ମିଶନ ପାଇଁ ରାଜ୍ୟ ସରକାର ₹୬,୫୩୭ କୋଟି ବ୍ୟୟ କରିବେ। ଏହା ମାଧ୍ୟମରେ ୭୦ ଲକ୍ଷରୁ ଅଧିକ କୃଷକ ପରିବାର ଉପକୃତ ହେବା ସହ ରାଜ୍ୟର କୃଷି ଉତ୍ପାଦନ, କୃଷକଙ୍କ ଆୟ ଓ ବଜାର ସଂଯୋଗକୁ ସୁଦୃଢ଼ କରାଯିବ।

ଯୋଜନାର ପ୍ରମୁଖ ଲକ୍ଷ୍ୟ

• କୃଷକଙ୍କୁ ବଜାର ସହ ସିଧାସଳଖ ଯୋଡ଼ିବା ଓ ଉତ୍ପାଦର ଉଚିତ ମୂଲ୍ୟ ସୁନିଶ୍ଚିତ କରିବା।
• ଡାଇରେକ୍ଟ ମାର୍କେଟିଂ (Direct Marketing) ଓ ଇ-ମାର୍କେଟିଂ ବ୍ୟବସ୍ଥାକୁ ପ୍ରୋତ୍ସାହନ।
• Single Point Levy ବ୍ୟବସ୍ଥା ମାଧ୍ୟମରେ କୃଷି ବଜାର ବ୍ୟବସ୍ଥାକୁ ସରଳ କରିବା।
• ଗ୍ରେଡିଂ, ପ୍ୟାକେଜିଂ, ଭଣ୍ଡାରଣ ଓ ପ୍ରୋସେସିଂ ଭିତ୍ତିଭୂମିର ବିକାଶ।
• ଜଳବାୟୁ ଅନୁକୂଳ କୃଷି, ଉନ୍ନତ ବିହନ ଏବଂ ଆଧୁନିକ କୃଷି ଯନ୍ତ୍ରପାତିର ବ୍ୟବହାରକୁ ବୃଦ୍ଧି।
• କୃଷକ ଉତ୍ପାଦକ ସଂଗଠନ (FPO), ସ୍ୱୟଂ ସହାୟକ ଗୋଷ୍ଠୀ (SHG) ଏବଂ ସମବାୟ ସଂସ୍ଥାକୁ ଅଧିକ ସଶକ୍ତ କରିବା।

କୃଷକଙ୍କ ପାଇଁ ମୁଖ୍ୟ ସୁବିଧା

• ରାଜ୍ୟରେ କୃଷି ବଜାର ସଂସ୍କାର କରାଯିବ ଏବଂ ବଜାର ବ୍ୟବସ୍ଥାକୁ ଅଧିକ ସ୍ୱଚ୍ଛ ଓ କୃଷକବନ୍ଧବ କରାଯିବ।
• ଉତ୍ପାଦର ପ୍ରୋସେସିଂ, ପ୍ୟାକେଜିଂ ଓ ସଂରକ୍ଷଣ ସୁବିଧା ବଢ଼ିବ।
• ରାଜ୍ୟରେ ନୂତନ କୃଷି ବଜାର ଓ ଆଧୁନିକ ମଣ୍ଡିର ବିକାଶ କରାଯିବ।
• କୃଷି ଉତ୍ପାଦର ଗୁଣବତ୍ତା ବୃଦ୍ଧି ସହ ରପ୍ତାନି ସୁଯୋଗ ବଢ଼ିବ।
• ଗ୍ରାମ ଓ ଆଞ୍ଚଳିକ ସ୍ତରରେ କୃଷି ଆଧାରିତ ଉଦ୍ୟୋଗ ବିକାଶ ପାଇବ।
• କୃଷକଙ୍କ ଆୟ ବୃଦ୍ଧି ସହ ଗ୍ରାମୀଣ ଅର୍ଥନୀତିକୁ ନୂଆ ଗତି ମିଳିବ।

ରାଜ୍ୟ ସରକାରଙ୍କ ମତାନୁସାରେ, OAPM କେବଳ କୃଷି ଉତ୍ପାଦନ ବୃଦ୍ଧିରେ ସୀମିତ ରହିବ ନାହିଁ, ବରଂ ବଜାର ସଂସ୍କାର, ଭିତ୍ତିଭୂମି ବିକାଶ, ପ୍ରଯୁକ୍ତିର ବ୍ୟବହାର ଓ କୃଷକଙ୍କ ଆୟ ବୃଦ୍ଧି ମାଧ୍ୟମରେ ଓଡ଼ିଶାର କୃଷି କ୍ଷେତ୍ରକୁ ଅଧିକ ପ୍ରତିଯୋଗିତାମୂଳକ ଓ ସ୍ଥାୟୀ କରିବ।